Një ngjarje e rëndë ka tronditur qytetin e Rijekës, ku tre vëllezër dyshohen për rrahjen brutale të një 16-vjeçari nga Kosova në qendër të qytetit, në orët e para të mëngjesit.
Dy prej tyre, Josip Vinković (29) dhe Tihomir Vinković (33), janë vendosur në paraburgim, ndërsa vëllai i tretë, Domagoj Vinković, është në arrati dhe po kërkohet nga policia.
Gjykatësi hetues i Gjykatës së Qarkut në Rijekë ka pranuar kërkesën e Prokurorisë dhe ka caktuar paraburgim për Tihomir Vinković për shkak të rrezikut të ndikimit te dëshmitarët dhe përsëritjes së veprës penale. Ndërkohë, Josip Vinković ishte dërguar në burg një ditë më parë, edhe për shkak të rrezikut të arratisjes, pasi ka lidhje biznesi me Gjermaninë.
Të dy vëllezërit akuzohen për tentativë vrasjeje ndaj një 16-vjeçari dhe tentativë për lëndim të rëndë trupor ndaj një 20-vjeçari, i cili kishte ndërhyrë për ta ndihmuar të miturin.
Sulmi ndodhi rreth orës 04:30 të mëngjesit në qendër të Rijekës. Sipas pamjeve të kamerave të sigurisë dhe dyshimeve të deritanishme, edhe vëllai i tretë, Domagoj, ka marrë pjesë aktive në sulm dhe dyshohet se ka qenë më agresivi, duke e goditur të miturin edhe kur ai ishte i shtrirë në tokë.
Pas arrestimit, ai pritet të merret në pyetje nga prokuroria dhe më pas të dalë para gjyqtarit hetues.
Babai i viktimës ka deklaruar për mediat kroate se beson se bëhet fjalë për tentativë vrasjeje dhe ka paralajmëruar padi penale dhe civile ndaj autorëve.
“Djali ishte ulur në një stol duke ngrënë burek kur njëri prej tyre iu afrua dhe i tha: ‘Çfarë po shikon?’ Ai u përgjigj se nuk po shikonte asgjë dhe mori një shuplakë. Kur u ngrit dhe e shtyu, të gjithë filluan ta sulmonin,” ka rrëfyer ai.
Sipas tij, gjatë rrahjes të dyshuarit bërtisnin: “E dini kush jemi ne?”, “Ne jemi mafia”, “Policia punon për ne”.
Familja e viktimës ishte zhvendosur në Rijeka vetëm dy muaj më parë nga Lošinj dhe, sipas babait, djali nuk kishte asnjë konflikt apo njohje të mëparshme me të dyshuarit.
Ngjarja ka shkaktuar reagime të shumta në opinionin publik kroat, ndërsa hetimet janë në vazhdim.
