Fundjava ka sjellë rritje të ndjeshme të qarkullimit në pikën kufitare të Morinës, ku mijëra qytetarë nga Kosova po udhëtojnë drejt bregdetit shqiptar për të kaluar ditët e pushimit.
Udhëtarët thonë se moti i favorshëm dhe çmimet e përballueshme janë ndër arsyet kryesore që kanë zgjedhur destinacionet turistike në Shqipëri.
“Koha është shumë e mirë dhe deti është alternativa më e mirë për të kaluar fundjavën me familjen. Edhe çmimet janë të arsyeshme”, shprehen disa prej qytetarëve.
Fluksi i shtuar po menaxhohet më lehtë falë procedurave të thjeshtuara kufitare, të cilat kanë hyrë në fuqi nga 1 maji. Kjo procedurë mundëson kalimin pa kontrolle për automjetet me targa të Kosovës dhe Shqipërisë, duke shkurtuar ndjeshëm kohën e pritjes në kufi.
Sipas Policisë Kufitare, gjatë 24 orëve të fundit në Shqipëri kanë hyrë mbi 26 mijë shtetas shqiptarë dhe të huaj. Autoritetet presin që numri i vizitorëve të vazhdojë të rritet gjatë fundjavës, sidomos drejt qyteteve dhe zonave bregdetare turistike.